Премини на содржината ↓

Често поставени прашања

За селекцискиот процес

Дали Македонија испраќа ученици во сите 17 СОК?

Досега, Македонија има испратено ученици речиси во сите СОК. Секоја година Комитетот располага со различен број места и за различни СОК кои се соопштуваат за време на втората фаза од селекцискиот процес.

Дали можам да одберам на кој СОК ќе учам?

Со оглед на унифицираниот академски квалитет и силниот интернационален карактер на сите колеџи, разликите меѓу нив се малубројни и безначајни. Сепак, Комитетот им овозможува на успешните кандидати по завршувањето на третата фаза од селекцискиот процес да ги подредат достапните колеџи во соодветната година согласно своите преференци. Овие преференци се земаат предвид при донесувањето на конечната одлука околу распределбата на местата, која сепак ја донесува Комитетот.

Меѓународната матура која се нуди на колеџите е достапна и во некои училишта во Македонија. Зошто тогаш да аплицирам на СОК?

Со својот исклучително интернационален состав на ученици и професори, СОК пружа животно искуство што го прави многу повеќе од обично училиште кое ја следи Меѓународната матура. Дополнително, начинот на кој оваа програма се следи во СОК е исто така уникатен. Иако различни СОК нудат различни предмети и воншколски активности во рамките на Меѓународната матура, изборот е честопати далеку поразновиден одошто во други средни училишта кои ја следат истата програма. Воедно, некои СОК нудат можност за изучување предмети формирани и изучувани исклучиво на тие колеџи, како на пример историја на уметност во СОК Италија и наука за морскиот свет во СОК Канада.

Ако сум трета година, дали тоа се смета за предност или мана?

Ни едното ни другото. Апликантите од трета година средно образование се оценуваат според исти стандарди како и оние од втора година. Апликантите од трета година средно образование кои веќе аплицирале неуспешно претходната година смеат да аплицираат повторно и ќе бидат оценувани исклучиво врз основа на прикажаното во актуелниот селекциски процес.

Успешните апликанти од трета година практично би ја повториле оваа година во СОК, бидејќи Меѓународната матура која се следи на колеџите е во времетраење од две години без оглед на појдовната точка на учениците. Комитетот секоја година добива голем број апликации од ученици од трета година, а воедно и некои од актуелните ученици аплицираа додека беа во трета година и воопшто не жалат за донесената одлука!

Дали постои можност да аплицирам доколку не исполнувам некој од условите за аплицирање?

Да. Слободно испрати ни порака на нашата фејсбук страница во која ќе ни наведеш кој/кои услов/и не ги исполнуваш и зошто сметаш дека поради ова не треба да ти биде ускратено правото да аплицираш, па ќе го разгледаме твојот случај засебно и ќе те известиме во најскор можен рок. Единствените два стриктни услови се апликантите да бидат во втора или трета година средно образование и да поседуваат минимум основно познавање на англиски јазик.

Ако сум од помало место и/или послабо средно училиште, дали тоа влијае врз мојата апликација?

Категорично не. Досегашните СОК ученици од Македонија доаѓаат од најразлични градови и рурални средини, како и од различни академски позадини. При разгледувањето на апликациите, Комитетот утврдува исклучиво колку апликантите имаат извадено максимум од средината од која доаѓаат.

Дали финансиската состојба на моите родители влијае врз мојата апликација?

Категорично не. Комитетот воопшто не бара податоци за финансиската состојба на семејствата на кандидатите пред објавувањето на резултатите од последната фаза од селекцискиот процес. Ваквите податоци се бараат дури откако успешните апликанти се веќе познати, односно дури во моментот кога се врши распределбата на успешните апликанти во достапните колеџи за соодветната година.

Кој ја врши селекцијата на ученици?

Селекцискиот процес се врши во целост од страна на Комитетот, кој пак е составен исклулчиво од завршени СОК ученици од Македонија. Голем дел од нас сè уште студираат, односно не се значително повозрасни од самите апликанти, што придонесува кон пријатна и опуштена атмосфера во втората и трета фаза од селекцискиот процес!

Кога ќе се одржат втората и трета фаза од селекцискиот процес?

Точните датуми зависат од достапноста на што поголем број членови на Комитетот, како и од разни логистички аспекти. Иако не можеме да прецизираме точни денови, можеме да потврдиме дека втората фаза ќе се одржи во текот на првите седум дена од јануари, а третата фаза кон почетокот на март.

Во ред, изгледа дека ги исполнувам условите... но сè на сè вреди ли да аплицирам???

Доколку имаш сомнежи дали токму ти си доволно добар/добра во конкуренција на врсници од целата држава, сети се дека сите апликанти сигурно ги имаат истите сомнежи! Немаш што да загубиш! Впрочем, пополнувањето на апликацијата ќе ти одземе најмногу ден-два, а може да ти ги донесе двете најубави години од животот J

Ако размислуваш далекусежно...

Дали престојот на СОК би ми ги отворил вратите за студирање во странство?

Преку специјализирани советници, сите колеџи нудат опсежна подготовка и поддршка за учениците при подготвувањето апликации за високо образование за време на СОК искуството, а и потоа доколку учениците не сакаат да го започнат своето високо образование веднаш по завршувањето на СОК искуството. Како последица на ова, најголем дел од СОК учениците се запишуваат на високопрестижни универзитети ширум светот, и тоа најчесто со целосни или барем делумни стипендии. Врвните светски универзитети исклучително го ценат уникатното меѓународно искуство на СОК учениците.

Дали движењето СОК е лошо за Македонија бидејќи ги одзема најдобрите ученици?

СОК има за цел да оформува самостојни лидери кои самите ќе одлучат во која средина најдобро можат да ги применат стекнатите знаења и искуства. Во последните дваесетина години, колку што се испраќаат ученици од Македонија, некои од учениците се имаат вратено во Македонија веднаш по завршувањето на СОК искуството, некои по завршувањето на високото образование во странство, а некои работат и живеат во странство. Сепак, сметаме дека сите завршени ученици имаат дадено значаен придонес за Македонија како своевидни амбасадори на нашата држава пред остатокот од светот за време и по своето СОК искуство. Некои од завршените ученици денес работат како универзитетски професори, владини советници, новинари, книжевни издавачи, правни консултанти и информатичари.